Kriza energjetike/BE, marrëveshje për tregjet e përbashkëta të gazit, ende s’ka një vendim për çmimin tavan

Ministrat e Energjisë të Bashkimit Evropian arritën sot një marrëveshje të përgjithshme që vendet duhet të fillojnë të blejnë së bashku gazin natyror para verës së ardhshme dhe gjithashtu ranë dakord se nevojitet një çmim alternativ referencë për gazin natyror, tha sot ministri çek Joseph Sikela.

Komisioni Evropian, megjithatë, nuk ka vendosur ende nëse do të përfshijë vendosjen e një kufiri për çmimin e gazit natyror në paketën e masave energjetike që do të propozojë javën e ardhshme.

“Ne do të shohim gjatë fundjavës se si mund të ecim përpara me kufirin e gazit natyror për prodhimin e energjisë elektrike – nëse është në këtë fazë që mund të themi se një shumicë e madhe e Shteteve Anëtare e mbështesin këtë masë,” tha komisioneri Kadri Sipson në një konferencë për media pas takimit të ministrave të energjisë të BE-së në Pragë.

Ministrat e energjisë të BE-së duan që puna në tregjet e përbashkëta të gazit të jetë gati për dimrin e ardhshëm.

“Ne duam të përshpejtojmë tregjet e përbashkëta dhe të përdorim fuqinë blerëse të të gjithë ekonomisë së BE-së për të garantuar sigurinë e furnizimeve për dimrin e ardhshëm, i cili mund të jetë edhe më kritik se ky,” tha Sikela pas takimit të ministrave të BE-së.

“Prandaj është kërkuar nga Komisioni që të përshpejtojë punën”, shtoi ai.

Takimi i ministrave të Bashkimit në Pragë ndihmoi për të kapërcyer mosmarrëveshjet midis vendeve anëtare të BE-së, tha Sikelá, i cili ishte mikpritës i takimit ndërsa Republika Çeke mban presidencën e radhës të BE-së. /abcnews.al/

Lexo me shume